LAOAG CITY – Isagsaganan ti Department of Agriculture (DA) ti maysa a 15-day cloud seeding operation iti Iloilo bayat ti manamnama a pangta ti dry spell iti lugar.
Mainaig iti daytoy, ti cloud-seeding ket maysa a solusion para iti weather modification no sadinno maipan dagiti kemikal wenno substansia kadagiti ulep tapno makatulong a mangbukel ken makapataud ti tudo.
Nupay kasta, inlawlawag dagiti eksperto a ti nasao nga operasion ket masapolna ti presensia ti “seedable clouds” ket saan daytoy a mabalin a makapataud ti tudo manipud iti nalawag a tangatang.
Segun ken ni Geron Magbanua, acting head ti Iloilo Provincial Agriculture Office, manamnama nga umuna a pangipadasan ti nasao nga operasion ti maika-lima a Distrito, partikular kadagiti lugar a nabayagen a makapaspasar ti kinakurang ti tudo a matmatayen dagiti mulada a pagay, nateng ken kadagiti dadduma pay a high-value crops.
Inbatad ni Magbanua a nakikoordinardan iti Department of Agriculture-Western Visayas kalpasan ti panangi-report dagiti mannalon, pakairamanan iti lugar ti San Rafael ken Sara a makapaspasaren ti panagtikag.
Kabayatanna, manamnama a mangrugi ti operasion iti maudi a paset ti Setiembre wenno inton sumaruno a bulan babaen ti maysa a third-party contractor.
Mainaig iti daytoy, agpokus ti nasao a cloud-seeding tapno makargaan dagiti dam, reservoir ken kadagiti dadduma pay a mabalin a pagummongan ti danum tapno manayunan ti suplay dagiti irrigation system.
