LAOAG CITY – Kinumpirmaran ti Bureau of Immigration (BI) ti panagturong iti sabali a pagilian ni dati a House Speaker Lord Allan Velasco.
Basar iti opisial a rakurak ti Bureau of Immigration (BI), awan ti manarimaan a Hold Departure Order (HDO) wenno aniaman a derogatory alert kontra ken ni Velasco a mangipawil kenkuana iti panag-ruarna ditoy pagilian.
Segun met ken ni National Bureau of Investigation (NBI) Director Melvin Matibag, nagturong ni Velasco idiay Nagoya, Japan idi Agosto 30 ken manamnama koma daytoy nga agsubli ditoy Pilipinas idi Setiembre 14, ngem awan pay ti rekord a nakaawid daytoyen ditoy pagilian.
Malaksid kadaytoy, inbatad pay ni Matibag a nagturong ti asawa ni Velasco idiay Hong Kong kaduana dagiti dua pay nga indibidual idi Setiembre 24, no sadinno agpadada iti asawana a ni Velasco nga awan pay ti rekord ti panagsublina ditoy pagilian.
Nakumpiramaran ti panagturong ni Velasco iti sabali a pagilian kalpasan a simmango ti dati a security aide-na a ni Rodulfo Gracioso Jr. iti National Bureau of Investigation (NBI) mainaig iti alegasionna a nangipatulod daytoy ti sumurok P2 billion ken ni Vice President Sara Duterte, P1 billion ken ni dati a Presidente Rodrigo Duterte ken P100 million met ken ni Rep. Paolo Duterte babaen iti pammilin ti dati nga Speaker idi tawen 2018.
