LAOAG CITY – Inrakurak ti Commission on Population and Development (CPD) a basbassit a Pilipino nga agayan-ayat ti agpakpakasar gapo iti seguridad iti pinansiyal ken ti gastos iti mismo a panagkallaysa da.
Segun kenni Mylin Mirasol Quiray, mangidaulo ti Commission on Population and Development Information Management and Communications Division, adda dagiti sumagmamano nga agayan-ayat nga agpakasar kas sumaruno nga addang iti relasyon da wenno ti praktikal a wagas no masikugan ti babai.
Inbatad na nga iti panagadal da, mas prayoridad dagiti maseknan ti economic well-being sakbay ti panagkallaysa da.
Idi 2024, bimmaba iti 10.2% ti bilang ti rehistrado a kasar ken manipud iti nasurok 414,000 iti napalabas a tawen ket bimmaba iti 371,825, basar iti Philippine Statistics Authority (PSA).
Kuna pay ti Commission on Population and Development nga umad-ado dagiti maladaga a maipasngay no sadinno dagiti nagannak kenkuana ket saan pay a nagkasar a mangipasimudaag a dagiti agayan-ayat ti mangbukel ti pamilya uray saan da pay a nagkallaysa.
