LAOAG CITY – Agtultuloy ita nga aldaw ti Lunes, Setiembre 7 ti impeachment trial ni Vice President Sara Duterte no sadinno indasar ti House prosecution panel ti baro a testigo tapno sungbatan dagiti saludsod mainaig kadagiti maipagarup nga indibidual a nailatangan ti confidential funds.
Pinaayaban ti prosekusion iti witness stand a ni Philippine Statistics Authority (PSA) Assistant National Statistician Marizza Grande.
Inbatad ti prosekusion nga nairaman dagiti opisial ti Philippine Statistics Authority kadagiti testigo para kadagiti alegasion ti nadakes a panagusar ti confidential funds gapu ta isuda ti nangisayangkat ti panangtingiting a mangipakita dagiti nagan nga adda iti acknowledgement receipts kas ni Mary Grace Piattos a saan a naipasngay, saan a nagkasar ken saan a natay iti pagilian gapu ta awan opisial a rekordna iti Philippine Statistics Authority.
Inlawlawagda pay nga iti babaen iti daytoy ket maipakitada a fake ken fictitious dagiti nadakamat nga indibidual a nangpaneknek nga adda napasamak a manipulasion ken nadakes a panagusar iti pondo ti pagilian.
Naglikos ti testimonia ni Grande iti Article 1 ti impeachment case a mang-akakusar iti Bise Presidente a panaglabsing iti linteg iti sistematiko a nadakes a panagusar ken saan a naurnos a liquidation ti confidential funds nga aggatad ti P500 million iti Office of the President (OVP) ken P112.5 million iti Department of Education (DepEd).
Mainaig iti daytoy, dinutokan ti Senate impeachment court da Commission on Audit (COA) employee Bresilio Sabaldan, Department of Education Assistant Secretary Sunshine Fajarda, ken Police Major Jovelyn Magay nga agbalin kas testigo iti impeachment trial manipud Setiembre 7 agingga 9.
