LAOAG CITY – Dua a drug personality ti naarestar babaen iti naisayangkat a drug buy-bust operation ti Philippine National Police (PNP) – San Nicolas ken Provincial Drug Enforcement Unit iti Ilocos Norte Police Provincial Office.
Segun kenni Police Captain Sygman Benigno, ti chief of police iti nasao nga ili, ummuna a naisayangkat ti operasyon a nakatiliwan ti agtawen ti 45 ken residente iti Barangay San Marcos, San Nicolas.
Naala manipud iti suspek ti dua a sachet ti maipagarop a shabu nga agdagsen iti 1.5 grams.
Inlawlawagna a nabayag dan nga imonmonitor ti suspek gapo ta maipagarop nga intultuloy na ti iligal nga aktibidad na.
Kunana a basar iti listaan ket Street level individual ti suspek ken adda dagiti personalidad a kadua pay ti maseknan.
Naamoan a ti suspek ket natiliw ken naibalod idi 2012 ken nakaruar laeng iti pagbalodan ita a tawen.
Kabayatanna, kalpasan daytoy ket nakikoordenar met ti Provincial Drug Enforcement Unit kadakuada para iti sabali pay nga operasyon a nakatiliwan met ti maysa nga high value individual.
Innayon na a naala met iti daytoy ti lia a sachet ti maipagarop a shabu.
