LAOAG CITY – Saan a magawidan ti Senado iti panangilungalong ken panangipasa ti Senate Bill 1512 wenno ti gakat a gagem a mangbukel ti Independent People’s Commission (IPC) a mangimbestigar kadagiti maanomalya kadagiti proyekto ti gobierno.
Daytoy ti inpasingked ni Senate President Tito Sotto III iti baet ti kinaawan ti interes ti Malakanyang iti Independent People’s Commission iti panagamak nga agbalin a kapada laeng daytoy ti Office of the Ombudsman ken Department of Justice.
Inbatad ni Sotto a saan pay a naadal ti Palasyo ti nadakamat a nailungalong a gakat.
Kunana nga iti husto a panawen ket mabalindanto a talantanen ken ipalawlawag iti Malacañang ti gagem ken linaon ti Senate Bill 1512 no sadinno a ni Sotto ti kangrunaan nga author.
Inpettengna a ti nailungalong nga Independent People’s Commission ket ad-adda a naiget ken addaan ti bileg maidasig iti Independent Commission for Infrastructure (ICI) a ti pammilin laeng ket tumulong iti imbestigasion kadagiti maanomalya a flood control projects.
Kabayatanna, apaman a malpas ti 2026 national budget ket sumaruno a tutukan ti Senado ti panangipasa iti gakat nga Independent People’s Coalition.
