LAOAG CITY – Naduktalan ti Schools Division Office – Laoag nga adda dagiti nagannak ditoy ciudad nga isuda a mismo ti mangpasardeng kadagiti annak da a sumrek iti pagadalan.
Daytoy ti inbutaktak ni Mr. Raymund Santos, ti Education Program Supervisor ti Division Office.
Segun kenni Santos, maysa laeng daytoy a rason a naduktalan da no apay nga adda dagiti estudyante a saanen nga agtuloy nga agbasa.
Inbatad na a dagiti dadduma a rimuar iti survey ken house visitation dagiti guidance counselors ken mangisursuro ket ti kinakurapay, child labor, nasapa a panagsikog ken problema iti pamilya.
Gapo iti daytoy, indasar ti konseho ditoy ciudad ti Laoag ti maysa nga ordinansa nga agkalikagom a mangipaay ti allowance, academic assistance ken psychosocial support.
Inlawlawag ni SK Federated President Michael Agustin a nakaipalaon iti ordinansa a dagiti benepisyaryo ket rumbeng a low income ken indigent.
Kunana a dagiti agbasbasa iti elementarya ket makaawat ti 1500 pesos kas monthly allowance idinto a dagiti Junior High School ken Senior High School ket makaawat ti 2,500 pesos monthly allowance.
Inbatad na nga iti napalabas a dua a tawen nga adda ti kastoy nga ar-aramiden ti city government ket makita ti panagbaba ti bilang ti drop-out nga estudyante rason a kalikagom da a pagbalinen daytoy kas maysa nga ordinansa tapno naan-anay a masolusyonan ti panagsardeng ti panagadal dagiti estudyante ditoy ciudad.
