LAOAG CITY – Naiget nga ipatungpal ti Philippine National Police (PNP) ti “one-strike policy” kontra kadagiti police commander a mapaay a malappedan wenno insigida a maresolbar dagiti insidente ti indiscriminate firing wenno panagpaputok kadagiti paltog iti panangsarabo ken selebrasion ti paskua ken baro a tawen.
Inbatad ni Philippine National Police spokesperson Brig. Gen. Randulf Tuaño, nangiruaren ti maysa a memorandum circular ni Philippine National Police Chief Melencio Nartatez Jr. para iti pannakaipatungpal ti nasao a pagannurotan.
Inlawlawagna a no nakairekord ti insidente ti indiscriminate firing, maipapaayan ti police commander ti 36 nga oras tapno masolbar daytoy gapu ta no saan ket mare-relieve iti puestoda.
Naammoan a tapno malapdan ti insidente, ikonkonsiderar ti nailian a pulisia ti panangselyo kadagiti paltog dagiti police officer.
Kabayatanna, basar iti Philippine National Police, mangiwaras daytoy ti 100 a ribu a kapulisan iti intero a pagilian tapno bantayan dagiti dupudop a lugar iti holiday season.
Rugian a maipadalan iti heightened alert status ti Philippine National Police mangrugi inton Martes, Disiembre 16 ken full alert iti mismo a selebrasion ti paskua ken baro a tawen.
Basar iti Philippine National Police official, ti nangato a police visibility kadagiti naglabas a tawen ket nagresulta iti panagbaba dagiti mairekrekord a krimen.
