LAOAG CITY – Inbilin ni United States President Donald Trump ti naan-anay ken kumpleto a pananglapped kadagiti amin nga oil tanker a pinatawan ti pannusa a sumrek ken rummuar manipud idiay Venezuela.
Iti maysa a post, inbatad ni Trump nga ibilangen ti gobierno ni Venezuelan leader Nicolas Maduro kas foreign terrorist organization ken inakusaranna ti panagtakaw ti United States assets pakairamanan ti “Terrorism, Drug Smuggling ken Human Trafficking.”
Inaramid ni Trump ti rakurak maysa a lawas kalpasan a kumpiskaren ti Estados Unidos ti oil tanker manipud iti kabaybayan ti Venezuela.
Iti agdama, awan pay ti sungbat ti Venezuela kadagiti baro a rakurak ni Trump.
Kabayatanna, kuna ni Trump a napalikawkawan ti Venezuela ti kadakkelan nga armada iti pakasaritaan ti South America.
Maipalagip a namin-adun a daras nga inakusaran ni Trump ti Venezuela ti drug smuggling ken sipod idi Setiembre, dumanonen iti 90 nga indibidual ti napapatay ti United States military iti panangatakeda kadagiti bangka a maipagarup a mangipatpatulod ti fentanyl ken dadduma pay nga iligal a droga idiay Estados Unidos banag a naiget a naglikudan ti Venezuela.
