LAOAG CITY – Na-promote iti Department of Education iti babaen ti panangidaulo ni Secretary Sonny Angara ti 16,025 a mangisursuro ita a tawen.
Basar iti Department of Education, adda ti 41,183 pay a mangisursuro ti nakaproseson ken naikeddeng a maisubmitir iti Department of Budget and Management para iti sumaruno a bansada ti pannakai-promote.
Daytoy nga addang ket paset ti Expanded Career Progression system nga ipatpatungpal iti babaen ti administrasion ni Presidente Ferdinand Marcos Jr. tapno siguradoen a mapaspasaran dagiti mangisursuro ti panagdur-as kabayatan nga aktibo pay dagitoy iti serbisio.
Maysa kadagiti nabenepisiaran ni Claire Eusebio manipud idiay Tabuk City a ngimmato manipud iti Teacher III a nagbalinen a Teacher VI kalpasan ti 21 a tawen a panangisuro.
Inrakurak ni Angara a gagem ti reporma nga ikkaten ti makatubeng iti promosyon ken ikkan ti importansia ti panangikagumaan dagiti mangisursuro.
Iti pakabuklan, rinibu a mangisursuro iti intero a pagilian ti manamnama a mabenepisiaran iti daytoy a sistema a gagem a papigsaen ti propesyonal a panagdur-as dagitoy.
