LAOAG CITY – Rumrummuar nga adda ti pagsungsungbatan ti Malacañang iti panangipasana ti panangibilang kas most corrupt budget iti nailian a pundo ita a tawen.
Mainaig iti daytoy, inawagan ni dati a Justice Secretary Silvestre Bello III da dati nga House Speaker Martin Romualdez ken dati a chairperson ti House Appropriations Committee a ni Stella Quimbo kas utek kadagiti maanomalya a flood control projects.
Segun iti dati a sekretario, makapadanagen ti imbestigasion ken reklamo gapu ta nakasentro laeng kadagiti kontratista ken dagiti opisial ti Department of Public Works and Highways (DPWH) idinto a maipagarup a saan a maikankano dagiti lider ti Kongreso a patienna nga adda iti likudan kadagiti nasao a modus.
Nagserbi ni Quimbo a miembro ti bicameral conference committee kas vice chairperson ti Committee on Appropriations a nangsukat ken ni dati nga Ako Bicol Party-list Rep. Zaldy Co.
Karaman pay ni Quimbo iti small committee a maipagarup a naaddaan ti kontrobersial nga insertions iti 2025 national budget ken nagbalin a kontrobersial dagiti sumagmamano a proyekto iti distrito idiay Marikina City gapu ta naikabil iti Sunwest Construction and Development Corporation a kompania a konektado ken ni Co ti kontrata iti proyekto.
