LAOAG CITY – Nagpalagip ti Land Transportation Office kadagiti motorista ditoy probinsya para iti naan-anay a panagan-annad da ita nga holiday season.
Kuna ni Miss Susan Gagarin, ti mangidadaulo iti Land Transportation Office, maobserbaran nga umad-adon dagiti biyahero ditoy probinsya, sumagmamano laengen nga aldaw sakbay ti paskua ken baro a tawen.
Inbatad na a saan laeng koma a ti bukod a kinatalged ti panpanunuten dagiti motorista no di ket kitaen da pay ti pagsayaatan dagiti pada da nga agiturturong ti aniaman ti klase na a behikulo.
Innayon na a liklikan koma pay ti agririri iti kalsada wenno ti road rage ita nga holiday season.
Mainaig iti daytoy, inbalakad ni Gagarin nga ugalien a bitbiten dagiti dokumento dagiti lugan tapno maliklikan ti possible a pannakaperwisyo aglalo ket ado latta dagiti naiwaras a Land Transportation Enforcer, saan laeng a ditoy probinsia no di ket iti intero a pagilian.
