LAOAG CITY – Kiniddaw ni Mayor Rommel Labasan kadagiti residente iti ili ti Pinili nga agbalin da a napudno iti panangipaay ti impormasyon iti munisipyo tapno makaala ti tulong manipud iti lokal a gobierno.
Daytoy ti nagbalin a panawagan na kalpasan a maobserbaran na nga adda dagiti sumagmamano a residente a magibaga ti palso nga impormasyon tapno agbalin a benepisyaryo nangruna kadagiti baka kas kasukat ti panagapit da ti tabako.
Inlawlawag na nga tapno makaala kadaytoy a benepisyo ket rumbeng a makaapit ti maysa nga agtaltalon ti 1500 kilos ti tabako.
Kuna na a daytoy a tabako ket rumbeng a mailako kadagiti aggatang iti ili met laeng ti Pinili ken makatulong da iti ili gapo iti tax a maipaay manipud iti national government.
Inpakammo na a no gundawayan ti baka a maibunong ket kasapulan laeng nga ipakita ti PIV wenno Purchase In Voice.
Segun iti mayor, adda dagiti gundaway a dagiti residente a mapan agkiddaw ti tulong ngem ti maipakita a PIV ket manipud iti buyer ti sabali nga ili wenno ikeddeng da a 1500 kilos ti naapit da ngem maduktalan a saan a pudno basar iti datos no kasano ti kalawa ti daga a mulmulaan da.
Inbatad na a silulukat ti lokal a gobierno a mangted ti tulong laketdi dagiti pudno nga agkasapulan.
Innayon na pay a no saan da a maabot it 1500 kilos iti maminsan a panagapit da ti tabako ket mabalin da nga urnongen daytoy agingga a madanon da ti ksapulan a kilo.
Kabayatanna, immapela a maawatan kuma daytoy dagiti kailian na aglalo ket awanen ti sapulan da gapo ta libre amin nga ipaay ti LGU dagiti kasapulan da tapno agmula ket ti panakaipaay ti baka kadakuada ket bunos laengen.
