LAOAG CITY – Saan pay a nakikoordinar ni dati a Department of Public Works and Highways (DPWH) Undersecretary Maria Catalina Cabral iti House Infrastructure Committee kagiddan ti immuna a panagatendarna kas resource person.
Maipalagip nga inimbitaran ti komite ti dati nga opisial tapno ilawlawag dagiti sumagmamano a banag kas ti panangilatang ti pundo para kadagiti sumagmamano a proyekto, panangpabor kadagiti sumagmamano a contractor ken dadduma pay a kontrobersial nga isyu mainaig iti maanomalya a flood control projects.
Karaman kadagiti sumagmamano a kontrobersial a rakurak ni Cabral iti panagatendarna ket ti maipagarup a panangilatang ti agingga iti P51 billion a pundo iti distrito nga iggem ni Davao City Rep. Paolo “Polong” Duterte a napasamak idi 2020 agingga iti 2022.
Inbatad ni House Infrastructure Committee chair Terry Ridon, saannan a nakasarita ti dati nga opisial kalpasan ti immuna ken naudi a panagatendarna iti baet kadagiti napapateg nga impormasion a mabalin koma nga iburayna.
Kunana a ti testimonia ti dati nga opisial ti nasao nga ahensia mainaig iti panangilatang ti P51 billion iti distrito nga iggem ti dati a presidential son ti agserserbi a kadakkelan a rebelasion nga inruarna iti panangtalantan ti House Infrastructure Committee.
Inlawlawag ni Ridon nga awanen ti nagbalin a komunikasion ti komite ken ti kampo ni Cabral kalpasan iti daytoy, iti personal man wenno professional.
Inpettengna a saan a personal a nakikoordinar kenkuana ti pimmusay a dati nga Undersecretary para iti posibilidad ti nayon nga impormasion.
Kalpasan ti pannakatay ni Cabral ket rumrummuar a nangibati isuna ti adu a files a naglaon kadagiti proponent, pundo, lokasion ken dadduma pay a napapateg nga impormasion dagiti flood control project iti intero a pagilian.
Maysa kadagiti nakaala iti daytoy ket ni Batangas 1st District Rep. Leandro Leviste.
Kuna ni Rep. Ridon, ar-aramiden ti komite a maaddaan ti personal communication kadagiti maim-imbitaran a resource person.
Ni Ridon ti nagserbi kas chairperson ti House Infrastructure Committee a nangidaulo iti flood control scandal investigation iti Kamara de Representantes.
