LAOAG CITY – Ginutigot ti maysa nga House Prosecutor ni Vice President Sara Duterte a sangoen ti panangusig apaman a nakasublin ditoy pagilian kalpasan ti overseas trip-na.
Inaramid ni House Prosecutor Terry Ridon ti panawagan iti Bise Presidente iti baet ti agtultuloy nga impeachment trial nga addan iti maikalima a lawas ngem saan pay a simmango ti Bise Presidente.
Immunan nga inlawlawag ni Trial Presiding Officer Francis “Chiz” Escudero nga iti babaen kadagiti pagannurotan ti impeachment court ket saan nga obligado a sumango ti personal ti Bise Presidente iti impeachment trial-na ken maikonsiderar a maireprepresentar ti Bise Presidente babaen kadagiti legal counsel daytoy.
Kunana nga addan iti desision ni Vice President Sara no kalikagumna nga agturong iti pasdek ti Senado wenno saan.
Inpettengna nga agbalin a pinal laeng ti panagatendar ti Bise Presidente no mangipasa ti opisial a mosyon ti prosekusion tapno mangiparuk-at ti subpoena ti korte tapno obligaren isuna a sumango kas testigo.
Kwinestionaran ni Ridon dagiti biahe iti ballasiw taaw ti Bise Presidente no kasano a pinundoan daytoy.
Inpaganetgetna a dagiti biahe iti ruar ti pagilian ni Vice President Sara manipud 2025 agingga 2026 iti uneg ti 91 nga aldaw ket dakkel a gatad ti nagastos a mapatta-patta nga P8 million ti nagtipon a flights basar iti United Nations Daily Subsistence Allowance.
Innayonna a nasken nga ilawlawag ni Vice President Sara no sadinno ti naggapoan ti nasao a private funds.
Immunan nga inlawlawag ti Bise Presidente nga awan ti kuart ti gobierno ken ti laeng personal funds ti nausar kadagiti biahe daytoy iti ruar ti pagilian.
Maipalagip a nalpasen ti overseas trip ni Vice President Sara idi Hulio 31 basar iti inaprobaran a travel authority daytoy.
