LAOAG CITY – Posible a karaman nga ipasango a testigo ti House prosecution panel iti impeachment trial iti Senado ni Vice President Sara Duterte dagiti opisial manipud iti Anti-Money Laundering Council (AMLC), Office of the Ombudsman, Securities and Exchange Commission (SEC) ken National Bureau of Investigation (NBI).
Inbatad ni House Prosecutor ken Bicol Saro Party-list Representative Terry Ridon a napateg ti testimonia dagiti opisial mainaig iti alegasion ti saan a maipalawag a baknang ken posible a panaglabsing nga adda ti pakainaiganna iti State of Assets, Liabilities and Net worth (SALN).
Dinakamat ti kongresista nga ad-adalen pay laeng no iraman dagiti opisial ti Bureau of Internal Revenue (BIR) kas testigo mainaig iti tax records ni Vice President Sara ken ti asawana a ni Atty. Mans Carpio.
Kabayatanna, malaksid iti volunteer lawyers, mangala met ti prosecution panel ti financial experts, accountants ken auditors tapno tingitingen ti Anti-Money Laundering Council records ken State of Assets, Liabilities and Net worth tapno ad-adda pay a mapapigsa dagiti ebidensiada iti panangusig.
