LAOAG CITY – Inpetteng ni Senate President pro-tempore Ping Lacson ti kinapateg a maipasa nga insigida ti gakat a mangbukel iti Independent People’s Commission (IPC) a kasukat ti Independent Commission for Infrastructure (ICI).
Daytoy ket kalpasan ti panagikkat ni Independent Commission for Infrastructure Commissioner Rossana Fajardo.
Inbatad ni Lacson nga uray makatultulong iti imbestigasion ti maanomalya a flood control projects ti Independent Commission for Infrastructure ket agtaltalinaed laeng daytoy a maysa nga adhoc a komision ken saan a permanente.
Inlawlawagna a masapulen nga agbalin a linteg ti Independent People’s Commission tapno ma-institutionalize ken agbalin a naan-anay a linteg tapno maaddaan ti nalawag a mandato.
Kuna ni Lacson, mabalin a makatulong ti Independent People’s Commission iti panangresolbar kadagiti karit a sangsangoen dagiti commissioner ti Independent Commission for Infrastructure pakairamanan ti kinaawan ti immunity from suit ken ti kinaawan ti bileg nga ag-cite ti contempt.
Immunan nga inpasingked ni Senate President Tito Sotto III nga ipasa ita a 2026 ti nailungalong nga Independent People’s Commission.
