LAOAG CITY – Tiniliw ti Land Transportation Office (LTO) ti walo nga e-bikes ken e-trikes kalpasan ti implementasion ti e-trike ban kadagiti kangrunaan a kalsada idiay Metro Manila.
Basar iti rakurak ti Land Transportation Office, dagiti matiliw a mangiturturong ti e-trike kadagiti maipawil a kalsada ket mapatawan iti maiyannatop a pannusa maiyallubog iti Republic Act No. 4136 wenno Land Transportation and Traffic Code ken Joint Administrative Order No. 2014-01 pakairamanan ti panangipataw ti multa ken posible a ma-impound ti e-trike.
Iti inwayat nga operasion ti Land Transportation Office Law Enforcement Team, adda ti 114 e-bikes ken e-trikes ti ininspeksion ti ahensia.
Insayangkat dagiti inspeksion iti paset ti Quirino Avenue idiay Manila, Roxas Boulevard, C-5 Road ken EDSA nga agpada a karaman kadagiti kalsada a sakupen ti nasao a maipawil.
Segun iti Land Transportation Office, kasapulan ti panangipawil kadagiti e-trike iti napili a kangrunaan a kalsada tapno masolbar ti taray ti trapiko ken mapasayaat ti pakabuklan a kinatalged dagiti commuter ken motorista.
Inbatad ni Land Transportation Office Assistant Secretary Markus Lacanilao a kitkitaen payen ti ahensia dagiti ruta a mabalin a pagdalyasatan dagiti e-trike ken inallukoyna dagiti operator nga ikabesa dagiti kalsada a sakupen ti nasao a ban.
