LAOAG CITY – Naikeddeng nga agtataripnong ti Greenland’s parliament tapno talantanen dagiti pangta ni United States President Donald Trump a sakupen ti Arctic Island, maysa nga autonomous a region ti Denmark kas sungbat iti kumarkaro a geopolitical tensions nga adda ti pakainaiganna iti Russia ken China.
Iti maysa a joint statement a naiparuk-at idi Biernes, naminsan manen nga inpetteng dagiti lider ti lima a political parties iti Inatsisartut (Greenland’s parliament) ti pangikagumaanda iti isla para iti soberania nga agkedked iti ideya nga agbalin a paset ti Estados Unidos wenno Denmark.
Mainaig iti daytoy, inlawlawag dagiti Greenlanders a saanda a kayat nga agbalin nga Amerikano wenno Danish no diket agtalinaed a Greenlanders.
Immunan nga inrakurak ni Trump a nasken a matagikua ti Estados Unidos ti Greenland tapno maliklikan a maaddaan ti impluwensia ti Russia wenno China iti isla.
Inakusaran ti Amerika ti kinakurang ti presensia ti militar ti Estados Unidos iti babaen ti 1951 North Atlantic Treaty Organization agreement ken nagpangta nga agtignay ti Estados Unidos uray saan a kayat ti Greenlanders a maipan iti babaen ti Estados Unidos.
Segun kadagiti lider ti Greenland’s parliament, agbalin nga alisto ti panagtataripnong ti parliamento tapno siguradoen ti maysa a patas ken naiget a panangtalantan no sadinno a ti ‘Independence’ ti agbalin a sentro ti panagsisinnarita.
Basar iti maysa a 2009 agreement ti Greenland ken Denmark, adda ti karebbengan dagiti umili ti Greenlandic nga agdesision para iti panagwaywayas ngem nalawag ti takder dagiti lider nga isuda ti agdesision para iti masakbayanda nga awan ti pannakibiang dagiti gangannaet malaksid kadakuada.
Naammoan a ti nangibasaranda ket ti diplomatic dialogue kas maiyataday ti prinsipio ti international law ken ti karebbengan dagiti tattao.
Iti agdama, saan pay a masinunuo ti petsa mainaig iti maisayangkat a panagtataripnong ngem manamnama a maiyuswat daytoy inton Pebrero 3.
