LAOAG CITY – Inlungalong ni Senador Risa Hontiveros a mapawilan dagiti miembro ti political dynasty ken dagiti contractor iti proyekto ti gobierno nga agbalin a Party-list Representative.
Iti Senate Bill 1656 nga inpasa ni Hontiveros, inpettengna a saan nga usaren a raket ti political dynasty ken dagiti contractors ti party-list system.
Iti babaen ti Party-List System Act, mapawilan ti political dynasties iti pannakipaset iti party-list system ken mapawilan pay dagiti party-list nominees ken representatives nga addaan iti interes kadagiti government contracts.
Malaksid iti daytoy, saan a mapalubusan ti panagrehistro kas party-list organization nga agusar kadagiti nagan kas ti radio wenno television program ti ayuda wenno government assistance programs ken dagiti nagan ti public official wenno celebrities.
Maipawil pay no ti grupo ket para iti maysa a relihion wenno sektor ken no punpundoan ti gobierno.
Inlawlawag ni Hontiveros a gagem ti gakat a maisubli ti pudno a kalikagum ti party-list system ken maprotektaran daytoy manipud iti panangabuso.
