LAOAG CITY – Inpetteng ni Senador Risa Hontiveros iti Department of Justice (DOJ) nga iyalisto ti panag-extradite ken ni Kingdom of Jesus Christ (KOJC) founder Pastor Apollo Quiboloy idiay Estados Unidos.
Daytoy ket kalpasan a kinumpirmaran ni Philippine Ambassador to the United States Babes Romualdez a nagkiddawen ti gobierno ti Estados Unidos nga ikabilen kadakuada ni Quiboloy tapno dumalan iti panangusig iti sex trafficking dagiti menor de edad, fraud ken smuggling ti binulto a kuarta.
Inbatad ni Hontiveros a panawen tapno agnam-ay ti biag dagiti nagbalin a biktima ni Quiboloy.
Kuna ni Hontiveros, Chairperson ti Senate Committee on Women, Children, Family Relations and Gender Equality, iyik-ikkis ti hustisia dagiti naruay a babbai a nai-traffick ni Quiboloy iti intero a lubong.
Inlawlawagna a ti panagtalinaed iti pagilian ni Quiboloy a mangipapaay ti tured kadagiti mangsupsuporta iti pastor nga i-harass dagiti survivors a nagsarita kontra kenkuana.
Maipalagip a nagpaayab ti panagdengngeg ni Hontiveros mainaig iti panagabuso nga inaramid ni Quiboloy kadagiti babbai a miembro ti religious group no sadinno a nangngeg manipud kadakuada dagiti nakaladladingit a testimonia ti dati a televangelist.
