Napasamak ti dua a forest fire iti Old Angset ti Barangay Estancia iti ili ti Piddig ken Barangay Dagupan iti ili ti Vintar.
Segun ken ni F/Supt. Roxanne Parado, Provincial Fire Marshal ti Bureau of Fire Protection ditoy Ilocos Norte, narigatan dagiti bumbero manipud iti Bureau of Fire Protection iti ili ti Piddig ken Vintar gapu ta adayo ti lokasion ti uram.
Inbatadna a saan a madanon dagiti fire truck ken hose dagitoy gapu iti kinaadayona kadagiti nakapasamakan ti dua a forest fire.
Inlawlawagna nga adda ti agarup walo a kilometro ti pinagna dagiti bumbero iti uneg ti sumurok-kumurang uppat nga oras tapno mapan sebseban ti dumadakkel nga apoy kadagiti nadakamat a dua a lugar.
Inpettengna nga iti agdama ken manarimaan pay laeng ti imbestigasion dagiti otoridad no kasano ti kalawa ken ania ti namunganayan ti forest fire.
Mainaig iti daytoy, kiniddaw ni F/Supt. Parado iti publiko a makikoordinar dagitoy tapno maliklikan ti forest fire ditoy probinsia.
Naammoan a napasamak ti dua a forest fire idi rabii ti Lunes ken naideklarar a fire out iti kabigatan ti Martes.
Innayonna a napateg ti pannakikaykaysa iti tunggal maysa tapno malappedan ti aniaman a mangitunda ti uram.
