LAOAG CITY – Inlawlawag ti maysa a general practitioner a ni Dr. Toby Cruz, a genetic ti asthma a mabalin a matawid ti sumagmamano nga ubbing, ngem saanna a kayat a sawen a nakapuy ti bara na no matamaan iti nasao a sakit.
Inbatad ni Cruz a kaadoan a makapasar ti asthma ket gapu iti nagduduma nga allergen wenno substance a mangitunda ti allergic reaction.
Nupay kasta, kuna na nga adda dagiti ubbing a maidakkel da ti sakit nga asthma wenno mapukaw daytoy bayat a dumakdakkel da gapu ta pumigpigsa ti bara da.
Karaman kadagiti sintomas ti asthma ket maaddaan ti arigna adda ti agsultip no aganges, ken mabalin a maestablisar daytoy iti babaen ti test ken panagusar ti machine tapno rukuden ti kapasidad ti bara.
Inbalakad ni Dr. Cruz a tapno saan nga umatake ti asthma ket kasayaatan no maamoan no ania ti allergen iti pasyente.
Mainaig iti daytoy, inpakaammo ni Cruz a ti maysa pay a mangtrigger iti asthma ket ti nalabes a panagkatawa gapu ta agiparuk-at ti ado nga hormones a mangpabara kangrunaan na ti bara nga ad-adda nga agkippet.
