LAOAG CITY – Natay ti nakamotorsiklo kalpasan ti panagdinnungparda iti maysa nga SUV iti Barangay 21, Parang iti ili ti Sarrat
Segun ken ni P/Capt. Ashley Cacayorin, Hepe ti Sarrat Municipal Police Station, nabigbig ti biktima a nangiturong ti Honda TMX nga agmaris ti nangisit a ni John Arcebal Jr., agtawen ti 30, pintor ken residente ti Barangay Datu Parada, Sta. Ana, Cagayan idinto a nabigbig met ti driver ti SUV a Toyota Fortuner nga agmaris ti nangisit a ni Danilo Dela Cruz, agtawen ti 61, naasawaan, mangisursuro ken pastor ken residente ti Barangay Juan iti ili ti Solsona.
Inbatadna a basar iti inwayatda nga imbestigasion, kabayatan a dumaldalyasat ti SUV nga agpa-abagatan ket kellaat nga immagaw iti linya ti kalsada ti nakamotorsiklo a nangitunda ti panagdinnungparda.
Gapu iti daytoy, nagsagaba ti nakana a sugat iti ulo ti driver ti motorsiklo nga insigida a naitaray iti Dingras District Hospital ngem naideklarar a dead on arrival babaen ti attending physician idinto a saan met a naan-ano ti nangiturong ti SUV.
Mainaig iti daytoy, kuna ni P/Capt. Cacayorin a saan a nakasuot ti protective helmet ken awan ti driver’s license ti nakamotorsiklo idinto a kumpleto met ti dokumento ti driver ti SUV.
Inlawlawagna a sakbay ti insidente basar iti ala ti Close Circuit Television wenno CCTV camera ket adda pay immun-una a nasapgud ti nakamotorsiklo a kotse ken dandani a panagdinnungparda ti kapadana a motorsiklo agingga a nagdinnungparda iti SUV.
Kunana a maibilang nga accident prone area ti nakapasamakan ti disgresia.
Innayonna a saan metten nga interesado ti pamilia ti biktima a mangipila ti aniaman a reklamo kontra iti driver ti SUV gapu ta ikonsiderarda ti napasamak a maysa laeng nga aksidente.
