LAOAG CITY – Saan pay a masinunuo ti Malacañang ti nalawag a motibo iti likud ti naipila nga impeachment complaint kontra ken ni Presidente Ferdinand Marcos Jr.
Inbatad ni Palace Press Officer Atty. Claire Castro, saanda pay a nakita ti pormal a kopya ti reklamo isut gapuna a saan pay laeng a makaipaay ti Palasyo ti sigurado ken detalyado a sungbat maipanggep iti daytoy.
Inlawlawagna a ti impormasion nga iggem pay laeng ti Malacañang ket ti party-list a nangendorso ti reklamo ket maipagarup nga adda ti pakainaiganna iti maysa kadagiti contractor a dinakamat ti Independent Commission for Infrastructure (ICI) iti maim-imbestigaran a flood control scam.
Ti impeachment complaint ket inpila ni Atty. Andre de Jesus ken inendorso ni Pusong Pinoy Party-list Representative Jett Nisay a rumrummuar nga adda ti koneksionna iti JVN Construction and Trading, maysa kadagiti contractor a dinakamat ti Independent Commission for Infrastructure.
Mainaig iti daytoy, mamati ni Presidente Marcos nga usaren ti nalimpio a pananunot ken agtungpal iti linteg dagiti agpanpanday linteg iti panangtalantan iti reklamo ken saan nga usaren ti bukud nga interes.
Inpasingked ti Palasyo a nagtalinaed a nakapokus ti Presidente iti trabahona ken kadagiti programa a mangpasayaat iti biag dagiti Pilipino.
