LAOAG CITY – Inkari ti Presidente ti European Commission a ni Ursula von der Leyen a saan nga agsanud iti pangta ni United States President Donald Trump mainaig iti plano a panagtagikua iti Greenland.
Nagballaag daytoy a mabalin a kumaro ti koneksion ti Estados Unidos ken European Union gapu iti isyu.
Iti statement iti World Economic Forum iti Davos, Switzerland, inbatad ni von der Leyen a ti kumarkaro a tension maipapan iti teritorio ti Greenland a maysa nga autonomous territory ti Denmark ket mabalin a mangitunda ti “downward spiral” iti nabayagen nga alyansa ti Estados Unidos ken European Union.
Mainaig iti daytoy, nakasagana a makitaripnong ni Trump iti Davos tapno talantanen ti masakbayan ti Greenland a nabayagen a kalikagumna a maipan iti babaen iti kontrol ti Amerika no sadinno a madanagan dagiti lider ti Europa.
Nagpangta met ni Trump a mangipataw ti nayon a taripa iti walo a pagilian iti Europa mainaig iti saanda a panagkikinnaawatan idiay Greenland rason tapno ikonsiderar ti European Union dagiti posible nga addang ti panangibales.
Arig nagpasagid pay ni Trump kagiddan ti post-na iti Truth Social platform a nag-post isuna ti maysa a binaliwan a ladawan a mangipakpakita kenkuana nga agmulmula ti bandera ti Estados Unidos iti maysa a nabato ken agyelyelo a lugar nga addaan ti karatula a nakasurat ti “GREENLAND – US TERRITORY EST. 2026.”
Inpakaammo ni Trump a naaddaan isuna ti napintas a panagsinnarita iti telepono ken ni North Atlantic Treaty Organization, Secretary General Mark Rutte maipanggep iti mineral-rich ti Greenland.
Kinumpirmaranna ti plano a panagtataripnong dagiti maseknan a grupo iti Davos.
Inpettengna a saan a naan-anay a lumaban dagiti lider ti Europa iti gakatna ken kunana a “They can’t protect it.”
Kabayatanna, naikeddeng a mangisayangkat ti emergency summit dagiti lider ti European Union iti Brussels inton bigat, aldaw ti Huebes tapno talantanen ti isyu ti Greenland.
