LAOAG CITY – Kinumpirmaran ti Cybercrime Investigation and Coordinating Center (CICC) ti dakkel a panagbaba ti text scams iti pagilian iti napalabas a tawen 2025.
Manipod iti nasurok a 1.28 milyon a kaso iti maikadwa a kwarter ti 2024, bimmagsak daytoy iti 65,035 nga insidente iti kapada a panawen idi 2025.
Katukad daytoy ti agarop 95 a porsiento a panagbaba a maibilang a dakkel a balligi kontra iti cybercrime.
Basar iti Cybercrime Investigation and Coordinating Center, nakatulong ti pannakaipatungpal ti SIM Registration Law iti panagkissay kadagiti peke a mensahe.
Nupay kasta, immakar dagiti scammer iti social media ken messaging apps.
Naipagagangay a modus iti agdama ket ti panagipatulod ti phishing links nga agpampammarang nga aggapo iti bangko wenno e-wallet.
Inpetteng ti Cybercrime Investigation and Coordinating Center a masapol nga agtalinaed a naridam ti publiko tapno saan a mabiktima kadagiti baro a klase ti online scam.
