LAOAG CITY – Makumikom ti Ilocos Norte Provincial Jail iti panagsagsagana para iti panangselebrar ti Valentine’s Day.
Segun ken ni Jail Warden Edietor Guiang, daytoy ti maysa kadagiti kangrunaan nga aktibidad ti padpadaanan dagiti balud nangruna kadagiti naasawaan.
Inbatadna nga ibilang dagiti balud a kapapatgan nga okasion ti aldaw dagiti puso gapu ta ditoy nga ad-adda a mariknada ti pudno nga ayat iti baet nga adda dagitoy iti uneg ti pagbaludan.
Kunana nga adda ti maisayangkat a zumba session dagiti balud para iti napinpintas a pammagbagi sakbay nga agkita dagiti balud nga addaan ti partner wenno asawa iti ruar.
Innayonna nga addanto pay ti gundaway nga ag-get together ti sibubukel a pamilia dagiti balud tapno maiyebkas ti ayat iti tunggal maysa kadakuada.
