LAOAG CITY – Balligi a nairubuat ti PBBM Gabay ng Bayan Program iti Ilocos Norte Centennial Arena.
Segun ken ni Department of Education Sec. Sonny Angara, dakkel daytoy a tulong para kadagiti mangisursuro nangruna ket adda ti nailatang a pundo manipud iti gobierno para iti tawen 2025 ken 2026.
Inbatadna a babaen iti daytoy a programa ket al-aliston para kadagiti estudiante gapu ta saanen a kasapulan pay nga uliten dagiti asignatura.
Inlawlawagna nga amin a kayatna nga alaen, vocational man wenno academic ket mabalin a paggigiddanenna iti baro a Senior High School program.
Kuna ni Sec. Angara a mabalin a mangala ti scholarship para iti daytoy uray adda ti agdama nga scholarship ti maysa nga agad-adal.
Mainaig iti daytoy, inpasingked ni Dr. Shirley Agrupis, Chairperson ti Commission on Higher Education kadagiti estudiante nga awan ti mabati babaen iti merit-based.
Inpakaammona a ti Bagong Pilipinas Merit Scholarship Program ket maysa a wagas tapno matungpal ti arapaap ti maysa nga estudiante a kalikagumna nga ag-enroll kadagiti priority programs iti pribado man pampubliko a pagadalan.
Naammoan a dagiti programa a mabalin nga alaen dagiti estudiante ket mainaig iti agriculture, education, healthcare, financial, engineering ken dadduma pay.
Innayonna a dagiti qualifications ket nasken a nagturpos a karaman iti top 5, aggapu iti low-middle class family ken ag-return service ditoy Pilipinas.
Kabayatanna, indanon ni Ilocos Norte 1st District Rep. Sandro Marcos ti mensahe ni Presidente Ferdinand Marcos Jr. kalpasan a saan a nakaatendar iti nasao nga aktibidad.
