LAOAG CITY – Masapol nga isubli nga umuna ni dati nga Ako Bicol Party-list Representative Zaldy Co ti maysa a bilyon a dolyar sakbay a makisarita ken ni Department of the Interior and Local Government (DILG) Secretary Jonvic Remulla.
Sungbat daytoy ni Remulla kalpasan a nasaludsud kenkuana no nakasagana ti gobierno a makidayalogo iti dati nga agpanpanday linteg.
Daytoy ket kalpasan ti “surrender feelers” wenno maipagarop a panagparikna ti dati nga agpanpanday linteg a sumuko ken intensiyon na ti makisarita kadagiti otoridad.
Inbatad ni Sec. Remulla ti posibilidad a ti pannakinegosyar ken ni Co ket nakadepende iti Ombudsman nga agsungbat.
Nupay kasta, kuna na a no isuna ti pagsaludsudan ket rumbeng nga isublina nga umuna ni Co ti maysa a bilyon a dolyar sakbay nga agsarit da ken maikkan ti gundaway para iti plea bargain.
Inpaganetget ni Remulla nga awn ti pinatay ti dati nga agpanpanday linteg no di ket kwarta ti innala na a masapol nga isubli na.
Maipalagip nga immunan nga inrakurak ti Palasyo a suportado na ti possible a dayalogo iti nagbaetan da Co ken Ombudsman no daytoy ti agbalin a tulbek tapno maibutaktak ti kinapudno iti anomalya iti flood control projects.
Iti agdama, kuna ni Remulla a maibilangen a pugante ni Co, a mapapati nga adda idiay Portugal nga adda ti iggem na a Portuguese passport malaksid pay ti maipagarop a golden visa na.
Kabayatanna, iti baet ti kaawan ti extradition treaty iti Portugal, kuna ni Remulla nga ar-aramiden amin ti gobierno tapno maisubli ni Co ditoy Pilipinas.
