LAOAG CITY – Awan ti plano ni dati a Presidente Rodrigo Duterte a mangsukat kadagiti miembro ti defense team na a mangig-iggem iti kaso na iti International Criminal Court (ICC).
Daytoy ti inrakurak ni Vice President Sara Duterte kabayatan ti kaadda na idiay The Hague, Netherlands iti agdama tapno bisitaen ti ama na.
Inbatad ti bise presidente nga indanun na iti ama na ti pakaseknan dagiti supporters na a saan da a mapnek iti ar-aramiden ti legal team na.
Nupay kasta, kuna ti bise presidente nga adda ti nagbalin nga instructions ti ama na iti legal team na, ngem saannan nga inpublikar pay.
Maipalagip a naarestar ni dati a Presidente Duterte ditoy Pilipinas idi Marso 11, 2025 iti bileg ti warrant of arrest nga inparuk-at ti International Criminal Court, no sadinno nga iti agdama ket nakabalud idiay The Hague gapu iti kaso a crimes against humanity gapu iti maipagarop nga extrajudicial killings kabayatan ti drug war iti administrasyon na.
Immunan nga inrakurak ti International Criminal Court Pre-Trial Chamber 1 a kabaelan ti dati a presidente ti makipaset iti pre-trial proceedings iti crimes against humanity a sangsangwen na.
Inkeddeng ti International Criminal Court ti pannakaiyuswat ti confirmation of charges ti dati a presidente intono Pebrero 23 ita a tawen.
