LAOAG CITY – Dinadael ti Philippine Drug Enforcement Agency Regional Office ti P48.9-M a balor ti marijuana iti kabanbantayan a paset ti Sugpon, Ilocos Sur ken Kibungan, Benguet manipud idi Enero 27 agingga ita nga aldaw, Enero 30.
Segun ken ni Atty. Benjamin Gaspi, Regional Director ti Philippine Drug Enforcement Agency ti Region 1, naiwayat ti umuna a marijuana eradication operation-da manipud idi Enero 27 agingga iti Enero 28 iti Barangay Licungan, Sugpon, Ilocos Sur no sadinno a nadiskubre dagiti otoridad ken dinadaelda ti agarup 46,750 a fully grown marijuana plants kadagiti nagduduma a plantation sites iti 10,450 square meters ti daga nga agbalor ti agarup P9,350,0000.00.
Inbatadna nga idi Enero 28 agingga iti Enero 29, simmaruno ti operasion iti nagbedngan ti Barangay Licungan, Sugpon, Ilocos Sur ken Barangay Tacadang, Kibungan, Benguet no sadinno a ginabot ken dinadaelda ti agarup 64,850 a fully grown marijuana plants a naimula iti 15,400 square meters nga agbalor ti P12,970,000.00.
Kunana nga idi met Enero 29 agingga iti Enero 30, sabali manen a nalawa a marijuana plantation ti nadiskubre dagiti otoridad iti kapada a boundary area no sadinno nga adda ti agarup 28,950 square meters nga adda ti pakabuklan a 126,900 a fully grown marijuana plants nga agdagsen ti 10 kilograms ti napagango a bulong ti marijuana ti dinadael nga agbalor ti agarup P26,580,000.00.
Gapu iti daytoy, inlawlawag ni Atty. Gaspi a manipud kadagiti tallo nga operasionda ket nangitunda iti pannakadadael ti 238,500 marijuana plants nga agbalor ti agarup P48,900,000.00.
