LAOAG CITY – Nangiwayat ti ocular inspection ti City Disaster Risk Reduction and Management Office ditoy siudad ti Laoag kadagiti carnival rides nga adda iti baba ti Gilbert Bridge.
Daytoy ket kas paset iti panagsagsagana ti lokal a gobierno para iti pannakarambak ti Pamulinawen Festival.
Segun ken ni Dr. Melvin Manuel, mangidadaulo ti City Disaster Risk Reduction and Management Office, kaduada ti Bureau of Fire Protection ken City Engineering Office a nangiwayat ti ocular inspection kadagiti carnival rides no sadinno a nagbalin met a napintas ti resulta daytoy.
Nupay kasta, inlawlawagna nga adda dagiti carnival rides a saan a mabalin a maidiaya para kadagiti ubbing.
Inbatadna a dagiti dadduma a carnival rides ket nasken a dagiti aglugan kadagitoy ket agtawen ti 10 ken agpangato.
Inpettengna a masapul a sakbay a mangrugi ti panagoperar dagiti carnival rides ket rumbeng laeng a kitaenda a naimbag tapno maliklikan ti aniaman a problema.
Kunana a nabalakadan dagiti mangimatmaton kadagiti carnival rides nga agikabilda ti pakaammo wenno pammalagip kadagiti aglugan kadakuada tapno ad-adda a mabayabayan dagitoy.
Mainaig iti daytoy, inpasingked ni Dr. Manuel a malaksid iti panangkitada kadagiti carnival rides ket naiget pay ti panangmonitorda kadagiti puesto iti trade fair.
Innayonna a kaduada pay ti City Health Office, Philippine National Police ken dagiti barangay tanod nga agbantay tapno maipasigurado ti linak, urnos ken talna kabayatan iti pannakaselebrar ti Pamulinawen Festival ditoy siudad ti Laoag.
