LAOAG CITY – Saan pay a nangiparuk-at ti red notice ti International Criminal Police Organization (Interpol) kontra ken ni dati nga Ako Bicol party-list Rep. Zaldy Co kalpasan ti sumurok maysa a bulan basar iti National Bureau of Investigation.
Immunan nga inrakurak ti National Bureau of Investigation nga addan ti inpatuludda a request iti Interpol idi Nobiembre 23, 2025 a manarimaan met a padpadaanan.
Inbatad ni National Bureau of Investigation spokesperson Atty. Palmer Mallari a manarimaan ti pannakikoordinar iti law enforcement counterpart idiay Portugal tapno beripikaren dagiti impormasion nga adda ti pakainaiganna iti ayan a lugar ken dagiti rekord ni Co.
Isagsagana metten ti surat iti Portugal para iti kasapulan nga impormasion pakairamanan dagiti rekord ti entry ken exit ni Co iti immigration iti nasao a pagilian.
Ammoen pay ti National Bureau of Investigation no naisyuan ti maaw-awagan a golden investor’s visa basar iti inrakurak ni Department of the Interior and Local Government Secretary Jonvic Remulla nga addaan ni Co.
Karaman nga iberberipikar no adda ti iggem a Portuguese passport ni Co ken no adda ti maipatpatungpal a rekord idiay Portugal mainaig iti aniaman a transaksion iti hotel, restaurant, transportation, panagusar ti credit wenno debit card.
