LAOAG CITY – Pormalen a nairubuat iti publiko ti Tan-ok ni Ilocano Festival Commemorative Coin.
Itamtampok ti Tan-ok ni Ilocano Festival iti maikadua a barya iti babaen ti 100-Piso Philippine Festivals Commemorative Coin Series.
Maipakpakita iti disenio ti barya dagiti simbolo a mangipaspasimudaag iti namaris a tradision kadagiti nagduduma nga ili ken siudad ditoy Ilocos Norte.
Ti tunggal barya ket magatang iti balor a ₱5,000.00 inton Pebrero 28, 2026 iti Bangko Sentral ng Pilipinas Pop-up Store, Ferdinand E. Marcos Memorial Stadium, Laoag City, Ilocos Norte.
Mabalin a magatang pay daytoy iti Bangko Sentral ng Pilipinas Store inton Marso 9, 2026.
Kabinnulig ti Bangko Sentral ng Pilipinas ti Department of Tourism ken National Commission for Culture and the Arts tapno maipasigurado ti husto nga impormasion ken kultural nga integridad ti kada disenio ti barya.
Mainaig iti daytoy, makita iti ladawan ti barya ti Basi Festival iti ili ti Piddig a nagballigi iti 2025 Tan-ok ni Ilocano Festival.
Kabayatanna, makita pay ditoy ti dua a diamond shapes iti border a mangirepresentar iti bulan ti Pebrero ken ti Tan-ok logo nga adda iti akinkannawan a paset ti barya pakairamanan dagiti 23 nga icons a mangsimsimbolo kadagiti 21 nga ili ken dua a siudad ti Ilocos Norte.
