LAOAG CITY – Madanagan ti Philippine National Police–Women and Children Protection Center (PNP-WCPC) iti panagadu ti kaso ti iligal a panaglako ti maladaga kadagiti naglabas a bulan.
Nairekord ti innem a kaso ti iligal a panagampon manipud idi Enero agingga iti umuna a paset ti Pebrero pakairamanan ti dua a baro a naisalakan a maladaga idiay Angeles City ken Baliwag.
Umuna a naisalakan ti maysa a dua nga aldaw laeng a maladaga a lalaki nga ilaklako iti online iti 30 a ribu a pisos no sadinno a naarestar ti ina daytoy.
Iti maikadua, maysa a tallo a bulan a maladaga a babai nga ilaklako iti balor a 130 a ribu a pisos ti naisalakan a naarestar met ti ina, ikit ken lola ti maladaga.
Inbatad ni Philippine National Police–Women and Children Protection Center Chief Brig. Gen. Maria Sheila Portento, ti panaglako dagitoy ket gapu ta kasapulanda ti tulong medikal ken panagpiyansa ti pamilia.
Natalgeden dagiti maladaga ken naipasa iti National Authority for Child Care.
Sumango dagiti uppat a suspek ti kaso gapu iti panaglabsingda iti linteg kontra iti human trafficking, child abuse ken cybercrime.
Inpetteng ni Portento ti peggad dagiti middlemen ken ti koordinasion ti nailian a pulisia iti social media platforms tapno ikkaten dagiti iligal nga anunsio kadagiti ubbing.
Nabalakadan ti publiko a dumalan iti lehitimo nga ahensia para iti natalged ken legal a panagampon.
