LAOAG CITY – Iyaw-awis ti Development Academy of the Philippines wenno DAP kadagiti agtutubo ditoy Ilocos Norte ti pananggundawayda iti Bagani Rising Leaders Development Program.
Inlawlawag ni Mr. June Arvin Gudoy, Vice President for Corporate Concerns Center nga addaan daytoy ti dua a component ti “open learning” nga “online” ti pakaisuroan dagiti agtutubo nga interesado iti daytoy a programa idinto a ti “fellowship program” ket adda ti mapili a 100 nga agtutubo a maipaayan ti naan-anay a panagsanay iti Development Academy of the Philippines idiay Tagaytay.
Inbatadna a ti “fellowship program” ti “national scale” ti Sirib Camp a nairubuat iti Ilocos Norte babaen ken ni Sen. Imee Marcos bayat a daytoy ti gobernador ti Ilocos Norte.
Segun kenkuana, ti nasao a programa ket maidiaya kadagiti agtutubo nga agtawen ti 18 agingga iti 30 ken daytoy ket pundoan ti gobierno.
Malaksid iti daytoy, inpakaammo ni Gudoy nga adda pay ti maididiaya iti Development Academy of the Philippines a Local Government Training.
Inlawlawagna a no kalikagum ti Provincial Government of Ilocos Norte nga adda ti maisayangkat a “training” a para laeng kadagiti agserserbi iti gobierno probinsial ket mabalin dagitoy ti agkiddaw iti Development Academy of the Philippines tapno dagitoy ti umay iti Ilocos Norte.
Kabayatanna, inlawlawag ni Mr. French Bandong, Project Officer ti Development Academy of the Philippines a kalikagumda a maiyammo ti nasao a programa iti intero a pagilian.
Nupay kasta, kunana a gapu ta naadaptar ti programa iti Ilocos Norte ket napilida ti Ilocos Norte nga immuna a nagturungan.
Innayonna a kalpasan ti probinsia ket sursurenda dagiti nagdumaduma a lugar ditoy Pilipinas para iti pannakailawlawag a naimbag daytoy a programa tapno ad-adu nga agtutubo a Filipino ti manggundaway.
