LAOAG CITY – Manamnama a sumango ti kaso dagiti uppat nga indibidual kalpasan a naarestar da gapu iti illegal a panagsusugal da iti maysa a balay iti Barangay Ablan iti ili ti Burgos.
Basar iti Philippine National Police, dagiti suspek ket agpapada nga addaan ti umno a tawen ken residente amin dagitoy iti nadakamat a barangay.
Inbatad dagiti otoridad nga adda ti naawat da a report a masansan nga adda dagiti agsusugal iti nadakamat a lugar isut gapuna a nangiwayat da ti operasyon.
Iti naisayangkat nga operasyon dagiti otoridad ket naaktwaran da dagiti suspek nga agsusugal, aglalo iti ay-ayam a “Pepito”.
Nakumpiskar dagiti otoridad iti lugar dagiti baraha, uppat a tugaw, maysa a lamisaan ken ti P2,900 a pisos a maipagarop a pusta dagiti suspek.
Nagtalinaed dagiti suspek iti Philippine National Police iti ili ti Burgos kabayatan a maisagsagana ti reklamo a panaglabsing ti Presidential Decree 1602 wenno illegal a panagsusugal a maipila kontra kadakuada.
