LAOAG CITY – Umad-adun dagiti gumatgatang ken agparpareserba kadagiti nagduduma a klase ti sabsabong iti Laoag City Public Market and Commercial Complex kagiddan iti pannakaselebrar ti Valentine’s Day inton bigat, Pebrero 14.
Daytoy ti inpakaammo ni Ms. Joan Cadoy, ti maysa kadagiti staff iti flower shop iti nasao a merkado publiko.
Segun kenkuana, addan ti sumurok 200 a bouquet ti naawatda nga order babaen iti online ken sabali pay dagiti agturturong mismo iti flower shop-da.
Inbatadna a malaksid kadagiti ar-aramidenda a sabsabong ket adda pay dagiti ididiayada a promo kadagiti costumers-da kas ti bouquet nga adda ti pasurotna nga human teddy bear ken tsokolate.
Inlawlawagna nga adda ti nagngatoan dagiti presio dagiti sabsabong kas ti maysa a rosas ket aggatad ti 150 a pisos, stargazer ket 500 a pisos, tulips ket 350 a pisos ken dadduma pay.
Malaksid iti daytoy, kunana a dagiti presio met dagiti arranged flowers wenno bouquet ket agbalor ti 500 a pisos ken agpangato depende iti klase ti sabsabong ken kadakkelna.
Kabayatanna, ginutigot ni Cadoy dagiti umili kangrunaanna dagiti adda ti kainnayatna, asawa ken pakairamanan dagiti single a mapan gumatang kadagiti lakoda a sabsabong tapno masurpresa dagiti loved one dagitoy.
