LAOAG CITY – Nasken a dumalan iti Korte ti Pilipinas ti warrant of arrest nga iparuk-at ti International Criminal Court (ICC) kontra kada Senador Ronald “Bato” dela Rosa ken Senador Bong Go.
Inbatad ni Senate Pro Tempore Panfilo Lacson, ti korte ditoy Pilipinas ket nasken nga irespetar ti aniaman nga addang nga aramiden ti International Criminal Court nga adda ti pakainaigan da dela Rosa ken Go.
Inlawlawagna a mabalin nga agaramid ti aniaman a legal remedies da dela Rosa ken Go idinto nga ad-adalen metten dagiti abugado ti Senado ti posible a maitulong iti dua a Senador.
Nupay kasta, iti agdama, kunana a nasapa pay nga ibaga daytoy gapu ta saan pay a nangiparuk-at ti International Criminal Court partikular kadagiti kaso ken pannusa kontra kada dela Rosa ken Go.
Innayonna a mabalin met nga agpaayab ti Caucus ni Senate President Tito Sotto tapno konsultaren dagiti dadduma pay a Senador mainaig iti daytoy.
