LAOAG CITY – Nakasaganan ti Metropolitan Manila Development Authority (MMDA) tapno mangipaay ti seguridad iti publiko ken agbalin a naurnos ti taray ti trapiko iti maikatlo a Trillion Peso March inton Pebrero 25.
Nangisayangkat idi Biernes ti Metropolitan Manila Development Authority ti walk-through kadagiti lugar a pakaiwayatan ti tignay protesta.
Inbatad ni Metropolitan Manila Development Authority General Manager Usec. Nicolas Torre III a ti trabahoda ket siguradoen a ti kangrunaan a kalsada ket madalyasatan kabayatan nga iwaywayatda ti tignay protesta.
Addan ti pannakikoordinarna iti Quezon City Government pakairamanan dagiti dadduma pay nga ahensia para iti nasao nga aktibidad.
Mangiwarasda dagiti enforcers kagiddan iti panangipatungpalda ti sumagmamano a re-routing tapno agbalin a napintas ti taray ti trapiko.
Mangikabilda ti ambulansia, tow trucks, dump trucks ken dagiti portalets kadagiti nagduduma a lugar.
Immuna iti daytoy, manamnama ti naruay a tattao ti makipaset iti programa gapu ta kagiddan met daytoy ti maika-40 nga anibersario ti EDSA People Power.
