LAOAG CITY – Adda ti pakabuklan a 1,557 a political prisoners idiay Venezuela ti nagaplikar para iti amnesty iti babaen ti baro a linteg iti nadakamat a pagilian.
Daytoy ti inrakurak ni National Assembly President Jorge Rodríguez, kabsat ni Venezuelan interim President Delcy Rodríguez ken nasinged a kaalyado ni dati a President Nicolás Maduro.
Maipalagip nga iti laeng kallabes ket ginasut a balu idiay Venezuela ti nawaya-wayaan.
Karaman ditoy ket ti pulitiko a ni Juan Pablo Guanipa, maysa kadagiti sumagmamano a nangiyebkas ti panangkritikar da ti paglintegan para iti pannakailasin ti dadduma a partikular a balud.
Immunan a ginutigot ti Estados Unidos ti Venezuela nga iyalisto da a wayawayaan dagiti political prisoners sipud nakemmeg ti US forces ni dati a President Maduro idi Enero 3 ita a tawen.
