LAOAG CITY – Inrakurak dagiti eksperto manipud iti Philippine Medical Association (PMA) a ti kinakurang ti bakuna, saan nga updated a clinical management ken kinakurang iti pannakipaset ti komunidad ti mangituntunda iti kaso ti dengue ditoy pagilian.
Inbatad ni Dr. Lulu Bravo a saan pay nga “adequately addressed” ti dengue ken adu latta a doktor ti saan nga updated iti umno a panangimaton iti daytoy.
Kuna met ni Dr. Florentina Uy a multifactorial ti problema pakairamanan ti papel ti gobierno, medical sector ken komunidad.
Inpettengna a masansan laeng nga agdalus iti aglawlaw dagiti tattao no addan ti nagsakit iti pamiliada.
Inpaganetget ni dati nga Health Undersecretary Dr. Enrique Tayag a saan nga umdas ti environmental ken vector control laeng.
Basar iti datos ti Department of Health (DOH), bimmaba ti 24% ti dengue cases idi 2025 maidasig idi 2024 ken 15% met ti nagbabaan ti mortality rate.
Nupay kasta, kunana a saan a nainkalintegan ti kinaadu dagiti matmatay.
Kabayatanna, kuna ni Department of Health Undersecretary Dr. Gloria Balboa nga adda ti nairekord a 14,907 dengue cases agingga iti Pebrero 14, 2026 a 70% a nababbaba maidasig iti kapada a panawen idi 2025.
