LAOAG CITY – Kinumpirmaran ti Philippine National Police (PNP) a saan a lumabes iti 20 a lugar ti ni-raid-da a posible a paglemlemmengan ti negosiante a ni Atong Ang.
Inbatad ni Philippine National Police Chief General Jose Melencio Nartatez Jr. nga adda ti sumagmamano kadagitoy a lugar ti naminsan manen a nagturonganda, saan laeng a namindua a daras no diket namitlo a daras pay ngem saan latta a nabirukan ni Ang.
Malaksid kadagiti lugar, kitkitaen pay ti pulisia dagiti pagayam ni Ang a mabalin daytoy a paglemmengan.
Kuna ni Nartatez, adda dagiti isla ditoy Pilipinas nga addan ti presensia dagiti pulis a nakasagana a mangarestar ken ni Ang no bilang makumpirmaran ti lokasion daytoy.
Agtultuloy ti pannakikoordinar ti nailian a pulisia iti international counterparts-da nangruna iti posibilidad a mabalin nga agusar daytoy ti sabali a nagan.
Mainaig iti daytoy, inpetteng ni Nartatez a kapada met daytoy ti addangda kadagiti dadduma pay a mabirbiruk kas kada Gerald Bantag, dati nga hepe ti Bureau of Corrections (BuCor); dati a Cong. Zaldy Co ken tallo nga executive ti Sunwest Construction and Development Corporation a nagtalinaed a nakalibas.
