LAOAG CITY – Inrakurak ni Davao City Mayor Sebastian Duterte nga awan ti planona nga agpaidasig iti nangatngato a posision inton 2028 kalpasan nga inbatadna a nabannogen ken nauman iti pulitika.
Inaramidna ti anunsio kalpasan ti panagbisitana ti amana a ni dati a Presidente Rodrigo Duterte a naelektaran kas Mayor ti Davao City ngem nagtalinaed a nakabalud iti The Hague.
Inaklonna ti panangidaulo iti siudad kalpasan a saan a nakapagsapata ti amana.
Mainaig iti plano a panagtaray para iti Presidente ti kabsatna a ni Vice President Sara Duterte inton 2028, kuna ti Mayor nga ad-adda a kalikagumna nga agtalinaed idiay Davao.
Nangipeksa isuna ti kinaawan ti talek iti International Criminal Court (ICC) nga agig-iggem iti crimes against humanity kontra iti dati a Presidente.
Kabayatanna, inpetteng ti administrasion ni Presidente Ferdinand Marcos Jr. a nagtungpal laeng ti gobierno iti responsibilidad daytoy a makitinnulong iti international tribunals.
