LAOAG CITY – Nagpanawagan ti maysa a negosiante a ni Sangguniang Panlalawigan Member Hanson Chua kadagiti gasoline station ditoy probinsia a saanda nga ipalubos nga aglako ti petroleum products a naka-container.
Daytoy ket iti baet ti panagngato ti presio kadagiti produkto a petrolyo gapu iti kumarkaro a tension iti Middle East gubuay iti rinnupak ti Estados Unidos, Israel ken Iran.
Segun kenkuana, napinpintas no direkta a maikabil ti petroleum products kadagiti lugan imbes a ti container tapno ad-adu ti mebenepisiaran a motorista.
Inbatadna a saan a nainkalintegan ti nangina unay a pannakaipangato ti presio dagiti produkto a petrolyo.
Inlawlawagna a maawatanna dagiti padana a negosiante ti kalikagumda nga agganansia iti negosio dagitoy ngem masapul a saan nga itulek a marigatan iti bulsa dagiti umili.
Mainaig iti daytoy, kuna ni Bokal Chua, kas maysa a mangimatmaton ti maysa a gasoline station, nasken laeng a saan nga aramiden ti panangabuso kadagiti motorista kagiddan ti panagngato ti presio dagiti produkto a petrolyo.
Maipalagip a manamnama a ngumato inton sumaruno a lawas ti 18 a pisos iti kada litro ti diesel, 8 pisos iti kada litro ti gasolina ken 28 a pisos iti kada litro ti kerosene.
