LAOAG CITY – Inbatad ni Senate Committee on Finance chair Sherwin Gatchalian a kasapulan ti gobierno ti nayun a P7-bilyon tapno masuportaran ti possible a repatriation kadagiti Overseas Filipino Workers no kumaro pay ti tensyon iti Middle East.
Segun ken ni Gatchalian, mapatta-patta nga umabot iti P13-bilyon ti pakabuklan a pondo a kasapulan tapno maisubli iti pagilian dagiti Overseas Filipino Workers, karaman dagiti undocumented workers.
Iti agdama, adda ti nailatang a P6-bilyon manipod iti 2026 national budget para iti repatriation efforts.
Maipalagip nga iti panagdengngeg iti senado idi Byernes, Marso 6, inbatad ti Department of Migrant Workers (DMW) a kasapulan da ti umdas a pondo tapno mapondian ti pannakaiyawid dagiti Pilipino iti Middle East no kumaro ti gubat iti rehiyon.
Kabayatanna, inbatad ni Gatchalian a kasapulan nga adalen a naimbag ti nailungalong a masuspenso ti excise tax iti langis ken pagbalinen laeng daytoy a maudi nga opsyon iti baet ti pangta ti dakkel a panagngato ti preyo ti petrolyo nga epekto ti tension iti Middle East.
Inlawlawag na a masuspenso ti excise tax, makissayan ti koleksyon ti gobierno a mabalin a makaapektar kadagiti serbisyo a maipapaay iti publiko.
Innayon na a saan pay a patas ti kastoy nga addang gapu ta dakdakkel ti makonsumo dagiti babaknang no ikompara dagiti marigrigat.
