LAOAG CITY – Naglikudan ni Barangay Chairman Fernando Baracao Jr., ti Barangay Salet-Bulangon ditoy siudad ti Laoag a maipagarup a nairuar ti sueldo dagiti nag-resign a Barangay Health Worker ken Barangay Tanod iti barangayda uray awandan iti trabaho.
Daytoy ket kalpasan nga adda ti naawat a reklamo ti Bombo Radyo Laoag babaen ti ipa-Bombo segment a maipagarup a nairuar ti sueldo dagiti nag-resign a Barangay Health Worker ken Barangay Tanod iti nasao a barangay iti baet a nagikkat dagitoyen nga agserbi iti barangay hall.
Segun ken ni Kapitan Baracao Jr., awan ti kinapudnona dagiti alegasion iti barangayda gapu ta nadalus ti rekordda iti Commission on Audit.
Inbatadna a mamati daytoy a dagiti agrekreklamo ket adda ti pakainaiganna iti maris pulitika.
Mainaig iti daytoy, inpakaammo ni Mrs. Cora Ventura, dati a Barangay Health Worker iti Barangay Salet-Bulangon ditoy siudad ti Laoag a saanna pay a naala ti 1,800 a pisos a maysa a bulan a sueldona.
Nupay kasta, inadmitirna nga isuna ti nagkurang no apay a saanna a naawat ti sueldona gapu ta saan daytoy a nakapasa ti maysa kadagiti requirement.
Maipalagip nga immunan a naglikudan ni Barangay Kagawad Sammy Marcos, ti Barangay Salet-Bulangon ditoy siudad ti Laoag nga adda ti mapukpukaw a pundo ti Sangguniang Kabataan iti barangayda.
