LAOAG CITY – Nagballaag ti Philippine National Police iti ili ti San Nicolas kadagiti nagannak a saan nga ipalubos nga agmaneho ti motorsiklo dagiti annak a menor de edad.
Daytoy ket kalpasan a pimmusay ti maysa a menor de edad a lalaki iti pannakadisgrasya ti inturong na a motorsiklo ti paset ti National Highway Manila North Road bisinidad ti Brgy 19 iti ili ti San Nicolas.
Ti biktima ket agtawen ti 16 ken residente iti Brgy. 10, San Paulo iti nasao nga ili.
Immuna iti daytoy, iti imbestigasyon ti Philippine National Police, napardas ti panagpataray ti biktima kabayatan ti panagpapalaud na, ken idi nadanun na ti agkurba a paset ti kalsada ket ditoyen a napukawan ti kontrol rason a na-overshoot iti igid ti kalsada ken naitupar iti concrete wall a nagsagabaan na ti nakana a sugat iti nagduduma a paset ti bagi na.
Intaray dagiti kameng ti Rural Health Unit ken Bureau of Fire Protection ti biktima iti Mariano Marcos Memorial Hospital and Medical Center iti ciudad ti Batac ngem saanen a nasalbar dagiti doktor ti biagna.
Naduktalan dagiti otoridd a ti biktima ket nakainom ti nasanger idi napasamak ti insidente.
