LAOAG CITY – Mamati ti kampo ni Senador Jinggoy Estrada a nakapsot dagiti ebidensia kontra kenkuana mainaig iti maanomalya a flood control projects.
Rakurak daytoy ti legal counsel ni Estrada idi nagturong ti Senador iti Department of Justice (DOJ) tapno personal nga agisubmitir ti kontra salaysay.
Sumangsango ni Estrada iti reklamo a plunder gapu iti maanomalya a flood control projects idiay Bulacan.
Inbatad ni Atty. Bianca Soriano, saan nga umdas dagiti dokumento ken testimonia tapno maituloy ti reklamo gapu kadagiti inconsistencies ti sumagmamano a testigo iti kaso.
Kabayatanna, kinumpirmaran ti kampo ni Estrada a nangipilada ti mosion iti Manila Regional Trial Court tapno ikkaten ti Precautionary Hold Departure Order (PHDO) gapu iti kinaawan ti pagibasaran.
Maipalagip a kiniddaw ti Senador iti Sandiganbayan a palubosan isuna a makaruar ditoy pagilian manipud inton Marso 30 agingga iti Abril 5 para iti personal trip.
Immunan nga inrakurak ni Justice Department a lappedanda ti aniaman a mosion tapno iwaswas ti Precautionary Hold Departure Order iti pammati nga addaanda ti umdas a pagibasaran.
